Tha daoine air a bhith a’ tighinn an seo - Teampall Mholuaidh ann an Nis - bho ùine nan creach airson leighis a lorg.

Tha àite air a’ bhalla làn pìosan beaga pàipear, mun coinneimh an dorais nuair a thig thu a-steach. Bidh daoine a’ sgrìobhadh an sin, na tha a’ cur orra. No, bidh iad a’ faighneachd as leth caraid no teaghlach. Tha daoine a’ dol tron an t-uabhas.

Anns na seann làithean, bhathas an dùil gum faigheadh tu faochadh bho galair-inntinn, nan caidleadh tu oidhche am broinn crìochan na -eaglaise. (Bha aig dine ri cadal, no chan obraicheadh e.)

Bhiodh cuid a dhaoine gan ceangal fhèin chun na h-altair airson na h-oidhche. Dh’fhàgadh cuid eile samhail ann am fiodh airson am pìos dhen bhodhaig a bha a’ cur dragh orra air an altair - agus iad an dòchas gun slànaicheadh sin iad.

Tha eachdraidh eile a tha garbh inntinneach ceangailte ris an àite, innsidh mi dhut mu dheidhinn.

Chaidh an làrach a dhèanamh coisrigte anns an siatheamh linn (mu 560 C.E, thathas an dùil). ‘S ann le sliochd MhicLeòid a bha e, gu traidiseanta, agus tha cruth air coltach ris an eaglais ann an Roghadal, sna Hearadh.

Tha airc-eòlaichean ag aontachadh gu ìre (am broinn dà cheud bliadhna co-dhiù), air cuin a chaidh an togalach (mar a tha e) a thogail.

Bha ceangal ri na Lochlannaich - le Miers at al (2008) an dùil gun deach a togail le na Lochlannaich air làrach Cheilteach. Sgrìobhte san eaglais fhèin, tha teacsa ag ainmeachadh Olaf Dubh. Agus tha làrach na h-eaglaise gu math coltach ri t’ èile anns a’ Ghraonlainn - Àrd-Eaglais Gardr.

Tha timcheall air trichead ‘s a h-aon làrach seann teampaill air Eilean Leòdhais, agus sia eile eadar Rònaidh, Sùlaisgeir, na h-Eileannan Flannach agus na h-Eileannan Mòra. Tha iad air an ainmeachadh às dèidh diofar Naomhan - tha trì ann airson Peadar, trì airson Colmcille, dhà airson Màiri agus mar sin air adhart.

‘S i an aon eaglais a tha air fhàgail le mullach, bho ro àm an Ath-Leasachaidh ann an Leòdhas. Bho dheireadh thall bhathas ga cleachdadh mar fasgadh airson caoraich gus an do thog iad airgead ann an 1912 airson a dhèanamh an àirde.

Tha gu leòr sgeulachdan inntinneach eile ceangailte ris an àite.

Nuair a thadhal Màrtainn Màrtainn air an àite ann an 1695, sgrìobh e gun robh nàdar fèill ann ceangailte ri torrachas air Là nan Naomh Uile. Bha e seo ceangailte ri Shony, seann Dia na mara.

Bhidh cuideigin a’ coiseachd a-mach dhan mhuir, suas chun an cuid meadhain, agus a’ dòrtadh leann air an uisge. An uair sin, ghabhadh iad drama. Thuirt an Capitein John Dymes ann an 1630:

Their custom was to eat and drink until they were drunk, and then, after much dancing and flirting together, they entered the chapel at night with lights in their hands and stayed there until the next morning in devotion.

Airson ùine mhòr, bha crois shnìomhte uabhasach breagha ann, a thàinig à Eilean Rònaidh. Cha deach ach aon eile coltach rithe a lorg air an eilean, bho àm nan Lochlannach. Tha i sònraichte dha-rìribh. (Thug an Eaglais Easbaigeach air falbh bhon eilean i, ach tha i a-nis ann an Comann Eachdraidh Nis, an dèidh iomairt a faighinn air ais.)

Tha a’ chrois seo cuideachd ceangailte ri torrachas. Tha fear ri fhaicinn air a’ chrois a tha gu math toilichte leis fhèin. Cha chan mi an còrr.

Cuideach thuirt Dymes:

Inside the chapel there is a sanctum sanctorum which is considered so holy that none of their women are allowed to enter it. Any pregnant woman does not dare to enter the chapel at all, but instead goes to certain places outside to say her prayers.

Leis gu bheil an làrach cho ceangailte ri torrachas, tha e rudeigin diobhalta gun robh iad a’ toirt air boireannaich bhochda a bha trom suidhe a-muigh, coltach ri Ryanair nam Meadhan Aoisean.

Tha tobar faisg air làimh cuideachd, Tobar Rònain, far am biodh daoine cuideachd a’ dol airson leighis airson tinneas-inntinn. Chì thu à Teampall Mholuaidh i.

Tha Cnoc a’ Bheannaich meadhanach faisg, agus ann an Nis, tha trì teampaill eile. ‘S fhiach e thadhal orra. Agus mura bheil sin comasach, tha mi air dealbh no dhà a thogail dhuibh.

Tapadh leibh airson leughadh agus thoirt an aire oirbh fhèin.

Airson sgrìobhadh air leth a leughadh mun chuspair, bhithinn a’ moladh an “Lewis Coastal Chapel-sites Survey (LCCS)” le Barrowman, R C (2020).

Agus cuideachd an leabhar aig Dr Finlay Macleòid - “The Chapels and Healing Wells of the Western Isles”.

Rinn mi cuideachd bhideo mu làrach sònraichte eile - Eilean Chaluim Chille air an Eilean Sgiathanach.